कावासोती – सातौं कावासोती नगर स्तरीय फुटबल प्रतियोगिताको उपाधि कावासोती ५ ले जितेको छ । आज भएको फाइनल खेलमा कावासोती ४ लाई हराउँदै कावासोती ५ ले उपाधि जितेको हो । कावासोती ४ र ५ बीच भएको खेलको निर्धारित समयमा दुवै समूहबाट १–१ गोल मात्र भएपछि खेल ट्राइबेकरमा धकेलिएको हो । ट्राइबेकरमा कावासोती ५ ले कावासोती ४ लाई ५–४ गोल अन्तरले पराजित गरेको नव छहारी सङ्गम युवा क्लवका अध्यक्ष हिमाल श्रेष्ठले जानकारी दिनुभयो ।
कावासोती नगर खेलकुद समितिको आयोजना तथा कावासोती नगरपालिका वडा नम्बर १ को कार्यालय एवं नव छहारी सङ्गम युवा क्लवको समन्वयमा भएको प्रतियोगितामा कावासोतीका १७ वटा वडाका १७ वटा टिमको सहभागिता रहेको थियो ।
प्रतियोगिताको विजेताले नगद ५० हजार रुपैयाँ र उप बिजेताले नगद ३० हजार रुपैयाँ राशीको पुरस्कार पाएका छन् । त्यसैगरी प्रतियोगिताको उत्कृष्ट खेलाडी, सर्वाधिक गोलकर्ता र सर्वोकृष्ट गोलरक्षकलाई पनि पुरस्कृत गरिएको छ ।
Leave A Comment